* لا تحزن لانك خسرت انسان اعتبرته اعز صديق من دون ان تُخطئ بحقه ،
بل احزن على وقتك الذي اضعته مخدوعاً بمن حسبته صديقك ،
فـ ليس من السهل ان تجد صديق يستحق ان تكون صديقه ،
فأنت اعلى من ان تحزن على امثاله الذين لا يستحقون حتى مجرد السؤال عنهم ،
فامضي في طريقك ، واسعد في حياتك ، فمازالت القلوب الصافيه موجوده ..
و يكفيك انك حزت على اكثر من قلب صافٍ !
~ واضحه : لا تتضايق انك خسرت صديقك ، او انّه راح عنّك او تركتوا بعض من دون ما تزعله او تغلط بحقه !
تضايق على الوقت اللي قضيته معاه و كنت مخدوع فيه ، واعتبره صج صديقك !
امشْ بحياتك ، وراح تلاقي قلوب اكثر صدقْ و طيبه من اللي ودعته !
لا تتدّم على شي فات خلاص عيش اليوم وودّع أمسْ : ) !
* الصديق وقت الضيق .
في احلى من هالمقوله ، و في اكثر تأثير ووقعْ منها ؟! ما اعتقد !!!
تحمل هالمقوله اشكثر معاني على عاتقها ، وياما وياما قلناها من دون ما نحس صج بـ معناها !
الصديق ، وقت الضيق ! يعني الصداقه الحقيقيه اهي اللي تحقق هالمقوله ، لما تكون متضايق
، والدنيا تكون صكّت كل بيبانها بويهك ، وتكون فقدت كل الآمال اللي تملكها ، وتكون وصلت مرحله ما يعلم فيها الا الله ..
واييّك صديقك يشيلك من كل هالآلام ! و يمسح كل دموعك ، و يحاول قد ما يقدر يدخلك جوّ الفرح و الوناسه .. !
ذيك الساعه حققّ هالمقوله بامتياز بعد : ) ! كونه وقف معاك بـ عز ضيقك ، و بدّل هالضيق بـ وناسه !
* سلامٌ على الدنيا ، ان لم يكن فيها صديقٌ صدوقٌ صادقُ الوعدِ مٌنصِفا !
فعلاً ، سلامٌ على الدنيا ان لم يكن فيها صديقٌ صادقٌ .. !شنو نبي من الدنيا اذا ماكان فيها لك صديق صادق ؟!
شنو نحتاج بـ هالوقت غير الصديق الصادق ؟! مو هذا اللي نحتاجه بـ هالوقت و بـ هالزمن؟!
منو اللي يشيلك بوقت ضيقك وحاجتك غير صديقك ؟ منو اللي يوقف معاك بـ عز ظروفك غير صديقك ؟
منو اللي يدري بكل اسرارك ، و يحفظها عنده بـ كل امان غير صديقك ؟! فـ شنو الدنيا من غير " صديقك " ؟!!!!! :/
* الصديق هو شخص يعرفك جيّداً ، ومع هذا يحبّك !
اشلون يعني ؟! اقروا العباره بـ تمعنْ ، يعرفك جيداً ومع هذا يحبك ، يعني بالرغم من انّه يعرف كل طباعك بما فيها البايخه ،
ويعرف كل عيوبك ، وفوق هذا يحبك .. ! يعني اذا كان صديقك صج ، راح يتحمل كل عيوبك و طبايعك اللي نادر من يتحملها ،
واذا كان مو صادقْ معاك ، فـ شي طبيعي ماراح يتحمل وبالتالي ماراح يكون صديقك لان ما حبّك بـ عيوبك :/ !!
ترى يندر بالهزمن هالنوع من الاصدقاء ، الحين من يعرف شي واحد بايخ فيك " تركك " !!
* ثمار الارض تجنى كل موسم... و ثمار الصداقة تجنى كل لحظة .
معناها : ان ثمار كل شجره يجنونها بموسمها ، اما الصداقه فـ ثمار هالعلاقه تجنيها بكل لحظه بحصوك على الحب ،
و الاهتمام هذا بحد ذاته ثمار كل ثانيه قاعد تجنيه من ورى هالعلاقه وشعورك بالراحه والامان مع هالصديق ،
هم ثمــار كل دقيقه تجنيه ، فـ عد وخربط من هالثمار : ) !
* ان تعيش بلا اصدقاء يعني ان تموت دون جنازة .
حسيتوا بأهمية الصديق بحياة كل انسان ؟! تخيّل نفسك تموت و مافي اي كائن كان بـ جنازتك :/ !
شغله توحّش و تحز بالخاطر مو ؟! الصديق مو بس بالدنيا ، يتبعك حتى بـ آخرتك و بنهايتك !!
و يتبع جازتك بعد عمرٍ طويل : ) !
* يمكن ان نعيش بلا اخوة ... لكن ليس دون اصدقاء .
بـ بساطه " حدي أؤمن بـ هالمقوله " !!!! يمكن قدر الانسان ومصيره ان يعيش بالدنيا ومايكون له اخوْ !
و ما يكتبله الله الشي :/ لكن صعب يعيش الواحد بدون اصدقاء ، الصديق ممكن يحل محل الاخ ،
وساعات يكون اقرب من اخوك .. وبـ معزته ! انطلاقاً من المثل اللي يقول " رُبّ اخٍ لم تلده امك "
اي صديقك مثل اخوك ، لكن الفرق بينهم ان امك ما ولدت هذا الصديق !
* لا يبرأ جروح القلب الا يد صديق .
جرّب تتضايق ، و تكون يم احد اصدقائك ، وقاعد يواسيك ! صدقني مافي اريحْ من جذي :/ !!!
وجود الصديق يمّك بـ ساعات ضيقك وتعاستك ، شي ما يتعوّض مع اي مخلوق كان .. !
الصديق بحياتك شي ما توصفه الكلمات ولا العبارات ! منو فينّا ما يحتاج يكون يم صديقه وقت حاجته له ؟!
وبـ عز ضيقه ؟! صدقوني كلنا نحتاج هالانسان بـ حياتنا .. و اكثر من حاجتنا لأي شي ثاني كان !!
* لا ترضى عن اخطاء اصدقاءنك لكن تقبّلها .
مو شرط تقبّلك لاخطاء صديقك يعني انك تتغاضى عن الغلطْ او ترضى فيه :/ ! لأ!! بالعكس ،
اذا ما نبّهت صديقك على الغلط ، فـ انت مو صديقه الحقيقي !! الصداقه تقتضي الصدق ،
و لازم ما ترضى بالغلط حتى لو طالع من اعز اصدقائك حتى تكون صادق معاه كفايه : ) !
و بـ جذي تمشي علاقتكم صح !
* الحياة وردة ... شمها و امنحها لصديقك .
اي نعم ، الايثار ثم الايثار ، ثم الايثـــــار !!! آثر كل شي لـ صديقك .. لان انت اهو و اهو انت ،
فـ راحته ووناسته اهي راحتك ووناستك ! لا تكون أناني ، بدّه على نفسك ، حاول تعطيه كل ما عندك ،
حاول تبادله كل المشاعر ولا تبخل عليه بـ شي ! بـ هالمقوله شبّهوا الحياة بالورده كـ مثال ،
و انك تشمها وتعطيها صديقك أي تعبيراً لـ ضروره وجود ايثار بينكم : ) !
* اجل جملتين يمكن ان نقولهما هما :
"يجب ان اتحدث اليك و لكن اريد ان نبقى اصدقاء" .
اي مهما اقول ، ومهما تعرف عني ، ارجوك ان نبقى اصدقاء ، وان هالشي اللي بقوله ما يأثّر عالعلاقه اللي تجمعنا .. !
حسسه بأهمية علاقتكم بالنسبه لك ، خله يعرف اهو شنو بحياتك .. صارحه بكل شي ولا تخاف ،
لا تحاول تخش عنه شي ، لان اذا عرف هالشي من وراك ، راح يصد عنك ، وياخذ موقف : ) !
كلمه مو مشكله ، حتى لو بشنو كان .. بس فهمه ان هالشي اللي بتقوله لازم ما يأثّر عاللي بينكم .. !!
وان اللي بينكم شي كبير صعب يخربه اي شي بهالدنيا !
* من يبحث عن صديق بلا اخطاء يبقى بلا اصدقاء .
فعلاً !! لا تحاول او تفكر انك تدور على صديق كامل مكمّل خالي من اي عيب ، او خطأ !لانك بتضيّع حياتك وعمرك
تدوّر وبالاخير ماراح تلاقي :/ اختار الصديق الـ اكثر تناسُباً معاك ، و عدّل قد ما تقدر من اخطاءه ..
بالعكس جذي راح تكون اقرب له ، و راح يذكرك بكل خير .. ! وراح يذكر انك انت عدلت فيه ويد اشياء !
وخلك قنوع بـ صديقك لان مهما كان اهو افضل من غيره : ) !
* كلمة واحدة تكفي لتخسر صديقا و لن تكفي الف كلمة لارجاعه .
ممكن بكلمه وحده تخسر صديقك ، و محاولاتك عقب كلها تبوء بالفشل !
كون هالكلمه كانت كبيره بحقه ، و جرحته فيها .. !
حاول تنتقي افضل الكلمات لما تخاطب صديقك ، لا توجّهله كلام يجرحه ، خل الكلام راقي و ذرب بينكم : ) !
عشان ما تخسره ، ولا يخسرك بـ يوم !
* الصديق دوما اغلى من النقود .
لا تبدّي الفلسْ على صديقك ، خلّه دوم اغلى من اي شي كان حتى " الفلوس " حسسه بأنه شي اغلى من الذهب ،
اغلى من الالماس اغلى من اي شي ثمين ! بأن علاقتك معاه ما تنباع حتى بكنوز الدنيا كلها !
خل الفلوس ترخص لـ عينه ، ودير بالك تخسره عشان هالشي البسيط " الفلوس " ! ترى الفلس يروح وايي ،
لكن صديقك ان راح ، ما يرد : ) ! ولا يعوضك مكانه انسان .. !
* ان تكسب اصدقاء ، هذا امر سهل .. ابقاءهم ، تلك قصة اخرى !
صح ! ممكن تكون العمليه سهله ، انك تكسب صديق ! لكن صعب تحافظ عليه ،
فـ كونْ قدها انت و حافظ على صديقك بشتى الطرق : ) !
* الصداقة روح تعيش في جسدين .
مفهومه ، وكلنا نقولها تقريباً من غير ما نحس بمعناها الحقيقي :/ ! فعلاً لما تختار صديق عمرك ،
بعد فتره تحس بأنك انت معاه جسدين لـ روح وحده !تحس بـ حزنه وضيقه قبل ما يتكلم ،
تسمع ضحكته و فرحته قبل ما حتى ما يبتسم ! تتألّم لـ آلامه ، وتفرح بافراحه !
و تكون انت اهو بس بـ جسد ثاني
* الصداقة الحقيقية لا تجمد في الشتاء " هذا مثل ألماني " .
اي ان علاقة الصداقه تمر بـ ظروف او فتور ! اي ان المشاعر بين الصديقين تبرد احياناً
فان كانت صداقه حقيقيه ، فـ هي تبرد قليلاً ولكنها لا تجمد ابداً ، فسرعان ما تعود لـ حرارتها بعد مرحلة الفتور
اللي غالباً ما تمر بـ سلام : ) !
* تبدأ الصداقة حين تقول لأحدهم : "انت ايضا .. كنت اضن انى الوحيد !
ما تييكم ساعات حالات لما احد جدامك يسولف عن نفسه ، عن طبايعه تحس ان قاعد يتكلم عنك انت ؟!
فـ تبدا تقوله " صج ؟ والله حتى انا !! ، والله صج ؟! انا بعد نفس الشي " !!!
وتحس بداخل نفسك ان هذا الانسان يشابهك بـ وايد اشياء ، واللي قاعد يتكلم عنه هذا انا مو اهوْ ،
اهني الصداقه الحقيقيه ، انك تكون تشابه صديقك اكثر من اي انسان آخر كانْ !
حتى توصل مرحله تحس انك اهوْ !!!
* في الصداقة لا مجال للحظ ، كل شئ يُبنى حجر حجر .
ما تقدر تقول ، حظي اهو اللي طيّحني بهالصديق ! لأ !!!
انت معاه بنيتوا هالصداقه حبّه حبّه ، طابق طابق لين وصلتوا فيها لـ مستوى حسيت انك فيه محظوظ
بـ هالانسان او بالاحرى بـ هالعلاقه : ) !
* ادا اردت بناء صداقة متينة يجب ان تحب اصدقاءك لانفسهم و ليس لنفسك .
حب صديقك لـ شخصه لـ نفسه ، لا تحبه لانه يلوقلك ، او لانه يناسبك او لاي سبب كان
غير انّه شخص مُناسب و مُؤهّل لـ بناء صداقه حقيقيه معاه !
::
مع كل اللي قلته ، وكل المقولات اللي انقالت وانطرحت اهني ،
نتفاجأ احياناً بـ ناس اعتقدناهم شي ، وانصدمنا فيهم بأنهم شي ثاني !
فـ لا تآمن اي شخص ، خلّك حريص باختيار صديقك و لا تنخدع :/ !!!
السبت أغسطس 08, 2009 6:09 am
